Pages

Friday, April 27, 2012

Ka Nu


"Ka nausenin tu nge mi kawl?
Ka nu, ka nu duh tak chu!
Tawng thei lovin tu nge mi pawl?
Ka nu, ka nu duh tak chu!
Ka dam lo va, a tlaivar a,
Ka tap a, min lo chawi mu thin.
Hah takin, chak lo chung pawhin,
Ka nu, ka nu duh tak chu!..."

Primary Sikul kan kal laiin he hla hi kan zir thin a. Kan sawi rual thup thup thin. A hun lai khan ngaihtuah chiang mang hlei lo khan kan lo zir liam ve mawp mawp mai thin a. Tun hnua ngaihtuah let leh hian a phuahtu Pi Nuchhungi hi a fakawm ka tiin nu te dinhmun dik tak a puangchhuak chiang hle in ka hria.

Ni e, nu te hi chu an hlu a ni. Kei atan phei chuan ka nu hi a hlu lehzual a, ka Pathian hmuh theih a nih angin tuna ka dinhmun thleng thei tura min enkawlna hi engtikah mah ka rul leh thei tawh ngai lovang. Ka nu kha mihring mihrinna ah chuan mi naran ve mai a ni a, lehkha a zir sang lova, hna sang a thawk hek lo. Mahse, a theih ang tawk leh phak ang tawkah ka tan theihtawp a chhuah thin.

Kum 1 pawh ka tlin hma in damlohna avangin vawi tam damdawiin ah kan lut a, na ka tawrh chang a ka belh tur awmchhun chu ka nu kha a ni. Sikul ka han kal a, naupang harh ngang ka nih avangin pencil te kha nitin ka ti bo a, tichung khan tuktin ka ipte ah la in a thlung bet ziah a, ka chala fawpin min thlahliam ziah thin. Tumkhat chu kan sikul bang hian mi in kawta ngun hlui tawh zet mai hi ka hawn ngawt mai pek a, a zan la la in amah nen a neitute kan zu pe leh thlap a nih chu! Thil te tham te pawh nise ruk a nih tawh chuan a ngaizam thei hauh lo.

Pawl 4 ka zir tum hian Board exam tur ka ni a. A hmaa ka zir lawk loh avangin exam dawnah ka zir vak mai a, chu chu ka tuar ta a...ka mit that loh tan lai vel a lo ni bawk nen. Ka khua a sik a, ka luak vak vak mai a. Lehkha zir thei ziazang ka nih loh avangin ka nu in min pawm a, ka note bu leh zirlaibute chu min chhiar sak a. Ka thiam hma chu a chhiar nawn tluk tluk mai a, a va fakawm tak em!Primary School Leaving Certificate Examination a Mizorama lang pha khawpa ka ziah theih chhan kha amah vang liau liau a ni. Ka nu, ka lawm e.

Hemi exam a ka tihthat avanga Chaltlang School Staff Association in Chaltlang Sikul zawng zawng hma a lawmman min pek ni te khan a hmelah min chhuang tih ka hmu thei a, keipawhin ka chhuang a ni. Mipa naupang na na na chuan inkhelh te kan tuipui a, tournament eng eng emaw ka khelh changte khan khawi field pawh nise min tawiawm a thulh ngai lova. A fapa inkhel thiam lo tak entur khan a hun leh tha a ui ngai reng reng lo.

Naupan lai chuan ngaihtuah a tawi a. Nu leh paten an zawh leh zawh loh pawh ngaihtuah lovin thiante thil neih ang kan han ngen ve a, an lei thei dawn lo tih hre reng chungin rilru dam nan min han aw e sak changa an rilru tur kha ka ngaihtuah let fo thin. Tumkhat chu Power Rangers (Tunlai Power Rangers suak ang nilo, a ori diktak, a lu thlak theih kha. :)) ka awh em avangin an bazarin min rawn hawn ve a. Lawm takin ka han hawng a, mahse, Mighty Ranger a lo ni si! Lungawi lo taka ka paih vel laite khan an hriat loh vang a ni tih leh min hmangaih vanga min lo leisak a ni tih ka lo hre lo kha a pawi ka ti thin!

Ka nu kha kohhran lamah a phak tawkin a inhmang ve thin a. Mahse, chhungkaw kalsan ngai khawp chi mawhphurhna an pek dawn erawh chuan a hnawl mai thin. Inkhawm changte hian kan chhungkua in kan kal dial dial thin a, Biak In atanga ka muhil min puak haw chang kha a tam thin teh e. Sande Sikula ka tan hmasak ber dawna tawngtai dan min zirtir te kha ka la hre reng thin. Tin, ka nu hian Bible chang thui tak tak min vawn tir thin a, chung te chu Sande Sikul inkhawmpui ah kumtin ka sawi ziah thin a, mi lawm pawh ka hlawh ve viau thin.

Tumkhat phei chu Bible bu hrang hrangte hming Genesis atanga Thupuan thleng hian a hla in min zirtir a, Beginners Dept a ka awm laiin inkhawmpui ah ka sa nghe nghe a ni. Tun thleng hian kha ka thil zir khan inkhawmna leh thil dangah Bible chang zawn hmuh zung zung theih nan min pui nasa a, a tangkai hle a ni.

Tin, ka nu khan lehkha a zir san loh avangin hma taka ka tawp mai a hlau em em a. Sikul luh hma atangin zirlaibu min chhiar chhuah tir vek thin a. Sikul kan han kal a, notes kan lak reng rengte hi ka kutziak a chhiat avangin chhiar a har thei em em a. Chuvangin a hranpa in kutziak mawi min zirtir thin a, chu a chhapah amah ngeiin notes bu hranah ka notes zawng zawng min ziah chhuah that vek thin a. Zantin min zawt a, a hunlai khan ning hle mah ila tunah a rah ka seng mek zel avangin lawm tur ka va ni tak em!

Exam kan han nei a, "Distinction-a i pass loh chuan ka vua ang che." a ti mai thin a. Ka van hlau thei tak e aw! Exam zawhah Question paper leh notes a enkawp in a mal malin min zawt leh thlap thin a, sawi chhuah theih loh palh chang chuan chal a ri leh fawk thin. Mahse, khatianga min enkawl avang khan Pawl 3 atanga Pawl 10 thlengin, Pawl 8 ah 1st Term ah ka S.P tih loh chu Pathian zarah Distinction ah ka pass vek theih phah a. Ka nu, Ka lawm e.

Tin, ka nu khan kan titi chang khan Doctor emaw, Pastor emaw nih tum turin min fuih thin a. "Mi tana malsawmna nih tluka tha a awm lo." a ti thin. Mahse, keiman IAS nih ka tum avangin ka um e ngai lova. Mahse, nu te duhthusam nge nge chu rilru pawhin a awn a niang e, mak tak maiin Doctor nih tumin ka zir ta daih mai a nih hi!

Ni e, ka nu hi chu ka engkim a engkim a ni tak meuh meuh a, ka lungngaihna leh hrehawm tawrh ka thlenna a ni a, ngaihzawng leh thian chungchang thlenga ka rawn ber a ni. Rawlthar chhuah chhoh velah mahni tha leh dik intiin inhmuh thiam loh zeuh zeuh chang nei thin mah ila, ka tana a thatna zawng zawngte kha ka damchhung pawh hian ka rul let zo tawh ngai dawn lo a ni. Chuvangin, keizwng, piang nawn leh dawn pawh ni ila ka nu tho hi nu atan ka la duh fo ang. A tana tih theih engmah nei lo mah ila ka tih ve theih tawk lawmthu sawina ziaka dahthat hi ka bat nia ka hriat avangin ka ziak chhuak ve ta rawi mai a nih hi.


Ka Nu, ka lawm e.

7 comments:

  1. gyhnam qop mae...
    PowerRanger luthlak thyh qh she we snnn...lolzz
    tha viauu .d.gdfgdfg

    ReplyDelete
  2. A ngaihnawmin chhiar a nuam lutuk. Hnuk a ulh lek lek thei hial mai. I nu chuan nu nih a va han tlin tehreng em! Nu hlutzia i pholang chiang teh e. Han inpuang zel teh, i lo turu riau..:)

    ReplyDelete
    Replies
    1. a lawmawm e. Tunlai chu ka nu leh keimah hi kan inhlat riau in ka hria a, ka han ziak ve rawi mai a nih hi.

      Delete
  3. va lunglen thlak tak i hla thu dah te khi :)

    ReplyDelete